ചെമ്പന്തൊട്ടി: എൽഡിഎഫിനും കേരള കോൺഗ്രസ്-എമ്മിനുമെതിരേ ആസൂത്രിതമായി വ്യാജപ്രചാരണങ്ങൾ നടത്തുന്നവർക്കെതിരേ കർശന നിയമ നടപടി സ്വീകരിക്കണമെന്ന് ഇരിക്കൂർ നിയോജക മണ്ഡലം കമ്മിറ്റി ആവശ്യപ്പെട്ടു.
പാർട്ടി പ്രവർത്തകരെ ഭീഷണിപ്പെടുത്തുന്ന തരത്തിലുള്ള ഊമക്കത്തുകൾ അയക്കുക, ഇരുട്ടിന്റെ മറവിൽ അപവാദ പ്രചാരണങ്ങളടങ്ങിയ പോസ്റ്ററുകൾ പതിക്കുക തുടങ്ങിയ രാഷ്ട്രീയ കുതന്ത്രങ്ങളിലൂടെ നേരിടാൻ ശ്രമിക്കുന്നവരെ കണ്ടെത്തണമെന്ന് യോഗം അധികൃതരോട് ആവശ്യപ്പെട്ടു. ഇത്തരം തരംതാണ നീക്കങ്ങൾ ജനാധിപത്യത്തിന് വിരുദ്ധമാണെന്നും കമ്മിറ്റി വിലയിരുത്തി.
എം.വി. ഗോവിന്ദൻ നയിക്കുന്ന എൽഡിഎഫ് വികസന മുന്നേറ്റ ജാഥയ്ക്ക് ഇന്ന് ശ്രീകണ്ഠാപുരത്ത് നൽകുന്ന സ്വീകരണത്തിൽ പാർട്ടി പ്രവർത്തകരെ പരമാവധി പങ്കെടുപ്പിക്കാൻ യോഗം തീരുമാനിച്ചു. മുന്നണിയുടെ കരുത്ത് വിളിച്ചോതുന്ന രീതിയിൽ സ്വീകരണം വൻ വിജയമാക്കാൻ പ്രവർത്തകർക്ക് നിർദേശം നൽകി.പാർട്ടി സംസ്ഥാന ജനറൽ സെക്രട്ടറി സജി കുറ്റ്യാനിമറ്റം ഉദ്ഘാടനം ചെയ്തു.
നിയോജക മണ്ഡലം പ്രസിഡന്റ് ബിജു പുതുക്കള്ളി അധ്യക്ഷത വഹിച്ചു. കെ.ടി. സുരേഷ് കുമാർ മുഖ്യപ്രഭാഷണം നടത്തി. വി.വി. സേവി, ബിനു ഇലവുങ്കൽ, സിബി പന്തപ്പാട്ട്, നോബിൻസ് ചെരിപ്പുറം, സണ്ണി മുക്കുഴി, ജയിംസ് മാനുവേൽ, രാജീവൻ, ടോമി ആനിക്കൂട്ടം, ബാബു തയ്യിൽ, ജയിംസ് ചിറമാട്ടേൽ, മാത്യു ചെറുചിലമ്പിൽ, അലക്സാണ്ടർ ഇല്ലിക്കുന്നുംപുറം, ഏലമ്മ ഇലവുങ്കൽ, വി.പി സെബാസ്റ്റ്യൻ, ജോണി ഉറുമ്പുകാട്ടിൽ, യാക്കോബ് ആലക്കൽ, ബോബി മാത്യു എന്നിവർ പ്രസംഗിച്ചു.